Lady Gaga thyen rekord në Rio me koncertin më të madh të karrierës

Lady Gaga ka dhënë koncertin më të madh të karrierës së saj, duke performuar para mbi 2.5 milionë fansave në plazhin ikonik të Copacabanës në Rio de Janeiro.

Shfaqja, që u mbajt të shtunën mbrëma, ishte falas dhe e financuar nga autoritetet lokale si pjesë e një fushate për të rigjallëruar ekonominë e qytetit.

“Sonte po bëjmë histori. Faleminderit që e bëtë këtë me mua”, u shpreh Gaga para turmës, ndërsa nisi koncertin me këngën “Bloody Mary”, shkruan DailyMail.

Artistja 39-vjeçare performoi disa nga hitet e saj më të mëdha, përfshirë “Poker Face” dhe “Alejandro”, duke ndryshuar disa herë kostumet – mes tyre edhe një me ngjyrat e flamurit brazilian.

Koncerti kaloi edhe rekordin e vendosur vitin e kaluar nga Madonna, që kishte mbledhur 1.6 milionë njerëz në të njëjtin vend. Organizatorët konfirmuan se këtë herë morën pjesë 2.5 milionë persona.

Fansat kishin mbërritur që në agim për të zënë vend, duke përballuar vapën dhe duke qëndruar me orë të tëra në këmbë apo edhe të ngjitur në pemë për të ndjekur shfaqjen.

Për të përballuar turmën e madhe, u vendosën 16 kulla zanore dhe rreth 5,000 forca sigurie, përfshirë policë, zjarrfikës dhe ushtarakë.

Kjo shfaqje erdhi si një rikthim i shumëpritur nga Gaga, pas anulimit të një koncerti në Rio në vitin 2017 për arsye shëndetësore. “Jam kthyer më e fortë se kurrë”, kishte shkruar ajo më herët në rrjete sociale. /Telegrafi/

The post Lady Gaga thyen rekord në Rio me koncertin më të madh të karrierës appeared first on Telegrafi.

Written by Admin