Frontmeni i grupit A-ha zbulon se vuan nga sëmundja e Parkinsonit: Tashmë nuk ndjehem sikur mund të këndoj

Frontmeni i njohur i grupës norvegjeze a-ha, Morten Harket (65 vjeç), ka bërë të ditur përmes faqes zyrtare të bendit se është diagnostikuar me sëmundjen e Parkinsonit.

Harket tregoi se prej kohësh ka pasur vështirësi me zërin, si pasojë e kësaj sëmundjeje progresive që dëmton trurin. “Problemet me zërin janë vetëm një nga arsyet pse ndjej pasiguri për të ardhmen time artistike,” tha ai. “Aktualisht, nuk ndjehem i aftë të këndoj — dhe kjo për mua është një shenjë e qartë”.

Magne Furuholmen, kolegu i tij nga grupi, tha se të gjitha aktivitetet e ardhshme të a-ha do të përshtaten sipas gjendjes së Harketit.

Lajmin Harket e dha gjatë një interviste në faqen zyrtare të bendit, me biografin Jan Omdahl. “Nuk kam pasur problem ta pranoja diagnozën,” u shpreh ai. “Me kohën kam përvetësuar mënyrën e të menduarit të babait tim 94-vjeçar: ‘Përdor atë që ende funksionon’”.

Në vitin 2024, në Klinikën Mayo në SHBA, Harketit iu vendosën elektroda në të dyja anët e trurit për të zbutur simptomat. Pajisjet janë të lidhura me një stimulues të vogël nën lëkurë, në kraharor, i cili dërgon impulse elektrike. Operacionet kanë sjellë përmirësim të ndjeshëm.

“Po jap më të mirën që të ngadalësoj përkeqësimin e sistemit tim të brendshëm,” tha Harket. “Është e vështirë të gjesh një ekuilibër mes medikamenteve dhe efekteve të tyre anësore. Ka shumë për të peshuar kur përpiqesh të imitosh mënyrën perfekte se si trupi kontrollon çdo lëvizje, situata shoqërore apo përballjen me jetën e përditshme”.

Megjithëse nuk pret të rikthejë “kontrollin teknik të plotë” mbi zërin e tij, Harket theksoi se ende po punon mbi disa këngë të cilat i konsideron shumë të veçanta. “Nuk jam i sigurt nëse do t’i përfundoj. Do të shohim nëse do të shohin dritën e publikimit. Më pëlqen ideja që të hyj në një projekt krejt ndryshe — si një pacient me Parkinson dhe si artist. Gjithçka varet nga unë — së pari duhet të përballem me këtë”.

Ai i dha një mesazh edhe fansave: “Mos më përkufizoni vetëm përmes këngës dhe karrierës. Këndimi është një përgjegjësi për mua, por kam edhe pasione të tjera që janë po aq pjesë e imja dhe po aq të vërteta.”

Edhe Furuholmen reagoi në Instagram, duke pranuar se, edhe pse bendi ishte në dijeni të diagnozës prej kohësh, lajmi zyrtar i ka prekur thellë. “Është e vështirë ta pranosh këtë,” shkroi ai. “Kemi shumë dhembshuri për Mortenin dhe familjen e tij, si dhe shumë mirënjohje për gjithçka që kemi kaluar bashkë”.

Grupi a-ha u formua në Oslo në vitin 1982, me anëtarë Paul Waaktaar-Savoy (kitarë), Magne Furuholmen (tastierë) dhe Morten Harket (vokal). Ata kanë pasur nëntë këngë në Top 10 të Britanisë, përfshirë hitet botërore Take on Me dhe You Are the One.

Në përmbyllje, Harket i ftoi fansat të mos shqetësohen për të, por të fokusohen në sfidat e vërteta të botës. “Zbuloni se kush doni të jeni — kjo mund të ndryshojë çdo ditë. Sjelluni mirë me natyrën, themelin e ekzistencës sonë, dhe ruajeni mjedisin sa ende kemi kohë. Unë jam në duar të sigurta”. /Telegrafi/

The post Frontmeni i grupit A-ha zbulon se vuan nga sëmundja e Parkinsonit: Tashmë nuk ndjehem sikur mund të këndoj appeared first on Telegrafi.

Written by Admin