Joe Rogan i impresionuar nga ribërja me inteligjencë artificiale e këngës “Many Men” të 50 Cent

Joe Rogan ka reaguar ndaj një ribërjeje të veçantë të hitit të vitit 2003 të 50 Cent, “Many Men (Wish Death)”, e cila është realizuar me inteligjencë artificiale në stil soul, duke e përshkruar si një performancë “shumë të mirë” dhe “të frikshme njëkohësisht”.

Në episodin e fundit të Joe Rogan Experience, 58-vjeçari ndau klipin me të ftuarin Carrot Top, duke theksuar se IA ka arritur të transformojë muzikën në mënyrë të jashtëzakonshme.

“Ata morën këngën ‘Many Men’ të 50 Cent dhe e bënë sikur është një këngë shpirtërore nga vitet ’50 ose ’60. Nuk është as zëri i një njeriu të vërtetë, por është kaq mirë. Ishte si të thosha: ‘Uau!’”, tha Rogan.

Ai shtoi se ishte e pazakontë të dëgjoheshin tekstet e një repi gangsterësh të interpretuara në stil soul, shkruan Complex.

“IA është shumë e frikshme, vëlla, kjo është shumë e mirë. Po të ishte një këngëtar i vërtetë, do të pyesja menjëherë kush është ky djalë. Ky zë është zjarr”.

Kjo nuk është hera e parë që një projekt i tillë me inteligjencë artificiale bëhet viral. Vitin e kaluar, krijuesi King Willonius fitoi vëmendje të madhe me versionin e tij në stil Motown të “Put It On Da Floor” nga Latto, si dhe me parodinë “BBL Drizzy”, që u shndërrua në një hit në SoundCloud me mbi tetë milionë transmetime.

Ndërkohë, 50 Cent nuk ka reaguar ende për ribërjen e këngës së tij të famshme. /Telegrafi/

– YouTube www.youtube.com

Written by Admin