Fund i një epoke: Kanale muzikore të MTV do të ndërpriten në gjithë Evropën deri në fund të vitit 2025

Një shenjë e kohëve që po ndryshojnë – dhe një vendim biznesi që njëkohësisht shënon një moment kulturor, duke sinjalizuar fundin e një periudhe të zbulimit kolektiv të muzikës dhe duke na bërë të reflektojmë mbi mënyrën se si e konsumojmë muzikën në epokën digjitale.

Është vërtet fundi i një epoke për ata që kaluan pjesë të çmuara të fëmijërisë së tyre para ekranit, duke pritur me padurim videoklipin më të ri, renditjen javore të hiteve apo gjithë magjinë e modës dhe kulturës pop që ofronte MTV-ja, shkruan EuroNews.

Gjiganti i argëtimit Paramount Global ka njoftuar lajmin e hidhur se pas 44 vjetësh transmetim të pandërprerë, një institucion i vërtetë kulturor do të mbyllet përgjithmonë më 31 dhjetor 2025.

Do të ndalen pesë prej kanaleve më të dashura muzikore: MTV Music, MTV 80s, MTV 90s, Club MTV dhe MTV Live. Fillimisht do të ndalen në Mbretërinë e Bashkuar dhe Irlandë, për t’u fikur më pas edhe në Francë, Gjermani, Austri, Poloni, Hungari, Australi dhe Brazil.

Ky vendim vjen në kuadër të masave të forta për uljen e kostove të ndërmarra nga Paramount Global, e cila këtë vit po bashkohet me Skydance Media. Përveç aspektit financiar, mbyllja pasqyron ndryshimet e mëdha në zakonet e shikimit dhe dëgjimit të audiencës, pasi dashamirët e muzikës janë zhvendosur masivisht drejt platformave digjitale.

Rrjetet sociale dhe platformat e transmetimit online janë bërë konkurrentë të pamëshirshëm, duke e bërë të pamundur për kanalet televizive të mbajnë ritmin – edhe pse për dekada ato krijuan një ndjenjë komuniteti që sot është zëvendësuar nga mënyra më personale e përjetimit të muzikës.

Kjo mbyllje shënon fundin e një trashëgimie të kulturës pop që nisi në SHBA në 1981, kur MTV transmetoi për herë të parë videon profetike “Video Killed The Radio Star” nga The Buggles.

Më pas erdhën momentet ikonike të kulturës pop:
– Premiera e videos legjendare “Thriller” të Michael Jackson në dhjetor 1983,
– Intervista e David Bowie-t që kërkonte më shumë hapësirë për artistët me ngjyrë në MTV,
– Emisioni revolucionar The Real World në fillim të viteve ’90,
– Shfaqja e Nirvanës me “Smells Like Teen Spirit” që e solli grunge në krye të muzikës,
– Apo përplasjet e paharrueshme mes Courtney Love dhe Madonna-s.

MTV nisi transmetimet në Evropë në vitin 1987, dhe emisione si MTV Unplugged u shndërruan në institucione më vete. Në kulmin e tyre, këto kanale i kthenin videot promovuese në vlera artistike, lansuan karriera muzikore, përhapën trende mode përtej kufijve dhe formësuan kulturën rinore për dekada me radhë.

Por në vitet 2010, televizioni muzikor tradicional filloi të zbehej përballë rritjes së rrjeteve sociale dhe platformave me përmbajtje “on demand”.

Marka MTV do të vazhdojë të ekzistojë përmes platformave digjitale dhe eventeve të njohura si VMA-t dhe EMA-t, por me fundin e vitit 2025, muzika në ekranet televizive, ashtu siç e kanë njohur brezat e tërë, do të jetë vetëm kujtim. /Telegrafi/

Written by Admin