Nga “Valle Kosovare” te “Kush të ndau prej meje” – këngët hit që Shpat Kasapi la pas me shkuarjen e tij të hershme në amshim

Sot (e mërkurë), në moshën 40-vjeçare, bota e artit shqiptar u zgjua me një lajm të zi për ndarjen e parakohshme nga jeta të këngëtarit të njohur Shpat Kasapi, një humbje e madhe për familjen, komunitetin artistik dhe publikun shqiptar.

Ai la pas një djalë të quajtur Roel, dhe një karrierë të pasur e të bujshme, me këngë që kanë lënë gjurmë të pashlyeshme në diskografinë shqiptare dhe në zemrat e fansave të shumtë. Humbja e tij është një goditje për muzikën shqiptare, pasi Shpati konsiderohet ndër artistët më ndikues të zhanrit pop dhe më të dashur të brezit të tij.

Telegrafi kujton disa prej këngëve që e bënë Shpatin të paharrueshëm dhe që i dhanë vendin e merituar në historinë e muzikës shqiptare:

Valle Kosovare

– YouTube youtu.be

Një këngë që nuk ka nevojë për prezantim. Me ritmet e saj folklorike dhe vargjet ilirike, ajo është kthyer thuajse në një himn të ahengjeve dhe festave shqiptare. Kënga, e interpretuar për Kosovën nga një djalë shqiptar nga Maqedonia e Veriut, ka arritur mbi 42 milionë klikime në YouTube dhe vazhdon të këndohet në çdo festë të madhe, duke bërë krenar çdo shqiptar që e dëgjon.

Kush të ndau prej meje

– YouTube youtu.be

Balada që preku zemrat e të gjithëve, një këngë për dashuritë e humbura dhe ndarjet nga gurbeti. Një hit i pashlyeshëm që vazhdon të rikthehet edhe sot në platformat si TikTok, duke treguar fuqinë e saj emocionale dhe ndikimin e Shpatit në skenën muzikore shqiptare.

Axhami

– YouTube youtu.be

Ishte vetëm një “azhami” në muzikës kur publiku shqiptar u njoh me të. Një nga këngët e para që e bëri Shpatin të njohur, një këngë për dashurinë e një djali të ri ndaj një vajze, e cila u prit me entuziazëm nga publiku. Një nga këngët që tregoi talentin e tij të hershëm dhe aftësinë për të krijuar emocione të forta tek dëgjuesit.

Falma

– YouTube youtu.be

“Falma” është pa dyshim një prej hiteve më të mëdha të Top Festit. Festivali, i cili dikur organizohej nga Top Media, kishte mirëpritur në edicionin e katërt Shpat Kasapin në një duet me Bleron, këngën “Falma”, që është pa dyshim një nga këngët më të bukura RnB të të gjitha kohërave.

Pa ty s’jetoj

– YouTube youtu.be

Një këngë që shënoi rininë e Shpatit dhe mbetet nostalgji për të gjithë të rinjtë e viteve ’90. Me këtë këngë, Shpati tregoi jo vetëm zërin e tij të veçantë, por edhe aftësinë për të prekur zemrat e publikut që nga fillimi i karrierës.

Trashëgimia muzikore e Shpat Kasapit është e pasur dhe e shumëllojshme, duke përfshirë këngë që nga baladat e ndjera deri te ritmet e folklorit dhe zhanret moderne.

Ai ka lënë gjurmë të thella jo vetëm në muzikë, por edhe në kulturën popullore shqiptare, duke mbetur një shembull i talentit dhe pasionit të vërtetë për artin. /Telegrafi/

Written by Admin