Pas deklaratave që bëri në TikTok, G Banit i anulohet koncerti në Drenas

Një deklaratë e bujshme e bërë nga këngëtari i njohur G Bani në TikTok ka sjellë pasoja të menjëhershme.

Artisti, në një video ku shprehej i revoltuar ndaj komenteve fyese që kishte marrë, u shpreh ndër të tjera: “Po të dija që janë kaq racistë ndaj meje, nuk do të më ndjente as në ‘99-ën”.

Kjo fjali u konsiderua e papranueshme nga organizatorët e festivalit “Muaji i Mërgatës” në Drenas, të cilët njoftuan anulimin e koncertit të planifikuar për mbrëmjen e nesërme. Në një deklaratë zyrtare, ata shprehën shqetësimin e tyre ndaj gjuhës së përdorur nga artisti.

“Si organizatorë të këtij festivali e konsiderojmë të papranueshme gjuhën fyese dhe mungesën e etikës në komunikim. Ky festival tashmë gëzon reputacion të lartë dhe nuk mund të jetë platformë për artistë që shfaqin qëndrime denigruese ndaj qytetarëve tanë”, thuhet në njoftim.

Organizatorët theksuan se “Muaji i Mërgatës” është një ngjarje që ka për qëllim bashkimin e shqiptarëve nga mërgata me ata në vendlindje, përmes kulturës, respektit dhe dinjitetit. Çdo shfaqje që bie ndesh me këto vlera nuk do të tolerohet.

“Respekt për të gjithë artistët e mirëfilltë që kontribuojnë me profesionalizëm, etikë dhe dashuri për publikun shqiptar”, u shtua më tej në deklaratë.

@unejam12 #gbani @G-BANI ♬ original sound – Elton_t2

Pas anulimit të koncertit, G Bani reagoi sërish me një video, ku tha se komentet e tij ishin të drejtuara ndaj një grupi ndjekësish që e kishin fyer, dhe jo ndaj të gjithë qytetarëve të Kosovës. Por, sipas organizatorëve, fjalët e tij e kishin kaluar kufirin e tolerueshëm dhe vendimi për anulim mbetet i pakthyeshëm.

Ky veprim shihet si një precedent i rëndësishëm për festivalet publike në vend: artistët janë të mirëpritur për të sjellë energji, talent dhe bashkim – por jo ndasi, përçmim apo gjuhë të urrejtjes. /Telegrafi/

The post Pas deklaratave që bëri në TikTok, G Banit i anulohet koncerti në Drenas appeared first on Telegrafi.

Written by Admin