Stil Novo lançon duet ndërkombëtar me Arta Bajramin “La notte di San Lorenzo”

Ylli shqiptar i muzikës, Arta Bajrami, ka hyrë në një bashkëpunim ndërkombëtar me grupin italian Stil Novo, në projektin e ri muzikor “La notte di San Lorenzo”.

Kënga është publikuar tashmë në radio dhe në të gjitha platformat dixhitale dhe shënon një hap të rëndësishëm për të dy artistët në përfshirjen ndërkombëtare të muzikës së tyre.

Stil Novo, i themeluar nga vëllezërit Viames dhe Antonio Arcuri, me pjesëmarrjen e Luana Bellucci (vokal), Alessandro Maiani (tastierë), Fabio Biagi (bateri) dhe Andrea Marchesi (bas), ka qenë aktiv prej vitesh në muzikën live dhe ka disa albume të publikuara nga AM Productions.

“La notte di San Lorenzo” është bashkëpunimi i tyre i parë ndërkombëtar dhe për ta, ky duet me një nga zërat më të njohur të skenës shqiptare, përfaqëson një moment të veçantë në karrierën e tyre.

Kënga është një baladë romantike, që rrëfen një histori personale e ndjerë gjatë natës magjike të 10 gushtit – natës së “Yjeve Rënëse”, një simbol i dëshirave dhe nostalgjisë në kulturën italiane.
Me një ton të ëmbël dhe melankolik, Stil Novo dhe Arta Bajrami sjellin një atmosferë intime të një dashurie të humbur në mes të festës dhe dritave të verës.

Në një koment për këtë bashkëpunim, Viames Arcuri, një nga anëtarët themelues të grupit, tha: “E shkrova këtë këngë në makinë, pas një shëtitjeje në plazhin e Crotones, në mes të gushtit. Sa herë që shihja një vajzë në plazh, ndihesha sikur po shihja personin që po kërkoja – por ajo nuk ishte aty. Jam shumë i lumtur që Arta pranoi të këndojë në këtë këngë, sepse mendoj se është një nga momentet më të larta të karrierës sonë”.

Arta Bajrami, e cila konsiderohet si një prej ikonave të popit dhe RnB-së shqiptare, me një karrierë që i ka qëndruar besnike cilësisë dhe identitetit për më shumë gjatë, është shprehur: “Jam shumë e lumtur me bashkëpunimin tim të ri me grupin italian Still Novo. Kënga dhe videoklipi do të publikohen në gusht dhe për mua është një hap i rëndësishëm – një përqafim mesdhetar i shpirtit tim artistik.”.

“Ky bashkëpunim është edhe dëshmi që muzika ime flet edhe jashtë kufijve dhe po vazhdon rrugën e vet përtej kohës dhe gjuhës”, thotë Arta. /Telegrafi/

The post Stil Novo lançon duet ndërkombëtar me Arta Bajramin “La notte di San Lorenzo” appeared first on Telegrafi.

Written by Admin