Street Party Prishtina shënon edicionin e gjashtë

Kryeqyteti po gjallërohet sërish me ngjarjen më të madhe urbane të vitit: Street Party Prishtina, që këtë vit shënon edicionin e saj të gjashtë, me sloganet Rrugët flasin me artin tonë – T’knojmë për qytetin tonë!

Ngjarja po mbahet sot 7 shtator 2025, nga ora 12:00 deri në 23:00, në zemër të qytetit, në rrugën “Fehmi Agani”, te zona e njohur si “Kafet e Vogla”.

Rruga është e mbyllur për qarkullim të automjeteve, duke u shndërruar në një hapësirë të hapur për art, muzikë dhe bashkëjetesë qytetare. Artistët që do të përformojnë janë producenti dhe artisti i njohur Kid Simius nga Berlini, Uran B. X Leg Off, MiM b2b Gentijana Zeneli, Armir, Angler dhe Dri.

Përveç artistëve mbi 20 artistë dhe inovatorë prezantojnë produktet e tyre. Street Party Prishtina VI sjell atmosferë unike ku muzika, arti dhe kreativiteti kombinohen për të krijuar një ditë feste për të gjithë.

Qytetarët do të kenë mundësi të përjetojnë performanca të ndryshme, ekspozime artistike dhe aktivitete kreative, duke e bërë këtë edicion një platformë të hapur për talentet e reja dhe energjinë kolektive të Prishtinës.

Kjo iniciativë ka për qëllim që, përveç argëtimit, të nxisë frymën e bashkëpunimit, kreativitetit dhe rigjallërimit urban, duke e kthyer hapësirën publike në vendtakim për komunitetin.

Street Party Prishtina, Edicioni VI është një ftesë e hapur për të gjithë qytetarët dhe vizitorët që duan të jenë pjesë e një feste që i takon të gjithëve.

Street Party Prishtina organizohet nga NXT LVL Events & Entertainment dhe WinMusic Freedom, nën patronatin e Komunës së Prishtinës, me sponsor të artë Guess Jeans, si dhe sponsor të tjerë Ibas, Birra Peja, Telegrafi, Ujin Rugova, Gekos dhe Shigi Studio.

Written by Admin